ПРОЦЕСНИ АСПЕКТИ НА СУЗБИВАЊЕТО НА ТРГОВИЈАТА СО ДРОГА: ПРЕДИСТРАЖНА И ИСТРАЖНА ПОСТАПКА ДО КРИВИЧНА ПРИЈАВА ВО РЕПУБЛИКА СЕВЕРНА МАКЕДОНИЈА

Abstract

Во овој труд се анализираат процесните аспекти на сузбивањето на недозволената трговија со дрога во Република Северна Македонија, со посебен акцент на предистражната и истражната постапка до поднесувањето на кривичната пријава. Трговијата со дрога претставува сложена форма на организиран криминал со меѓународна димензија, која создава сериозни закани за јавната безбедност, општествената стабилност и правниот поредок. Во трудот се анализираат правната и институционалната рамка со која се уредуваат активностите на полициските органи, Јавното обвинителство и другите надлежни институции во откривањето, истражувањето и гонењето на кривичните дела поврзани со дрога. Детално се разгледуваат прибирањето на првичните информации и докази, примената на посебните истражни мерки, форензичките вештачења, како и улогата на меѓуинституционалната и меѓународната соработка. Во истражувањето се применуваат нормативно-правниот, аналитичкиот и компаративниот метод. Нормативно-правниот метод се користи за анализа на релевантната правна рамка, со која се уредуваат спречувањето, откривањето, истрагата и кривичното гонење на трговијата со дрога во Република Северна Македонија, со посебен акцент на процесните овластувања и одговорности на надлежните органи, аналитичкиот метод за разгледување на процесните и институционалните аспекти на постапувањето вклучително и прибирањето и оценувањето на првичните информации и докази како и улогата на полицијата и Јавното обвинителство, особено внимание се посветува на критичката анализа на постојните процесни и институционални практики, вклучително и на предизвиците што произлегуваат од недоволните технички и човечки капацитети, додека компаративниот метод овозможува согледување на националната рамка во однос на релевантните европски и меѓународни стандарди, особено во поглед на институционалната соработка, современите истражни техники, како и заштитата и допуштеноста на доказите. Дополнително, се анализираат практичните предизвици кои влијаат врз ефикасноста на кривичната постапка, како што се недоволните технички капацитети, недостатокот на специјализирана обука и стручен кадар, како и сè поголемата употреба на дигиталните технологии од страна на криминалните организации. Врз основа на добиените наоди, се предлага унапредување на капацитетите за дигитална форензика, усогласување на правните стандарди, зајакнување на институционалната координација и поширока примена на современи истражни техники.