МАРКЕТИНГОТ И ВРСКАТА СО ПОТРОШУВАЧИТЕ

Abstract

Анализата на врската помеѓу маркетингот како научна област и однесувањето на потрошувачите создава нови знаења за потребите како на научната фела, така и на бизнис секторот. Овие знаења помагаат во креирање на јасни маркетиншки стратегии кои ќе треба да доведат до зголемена конкурентска предност на компаниите. Со подобрување на конкурентноста на компаниите, воедно се подобрува и конкурентноста на националната економија. Oпштествениот маркетинг концепт (21 век) ги предвидува можните конфликти помеѓу потрошувачките краткорочни желби и потрошувачката долгорочна благосостојба. Според тоа, се претпоставува дека маркетингот, всушност, треба да испорача вредност за купувачите на начин на кој ја одржува или подобрува благосостојбата на потрошувачот и на општеството. Помагањето на целната група би требало да биде првичната цел за постоењето на бизнисите, организациите и институциите. Во насока на создавање на фокус кон потрошувачите, неопходно е проучување и разбирање на она што значи вредности, задоволство и лојалност на потрошувачите, како и нивното однесување. Во суштина, однесување на потрошувачите е процес и активности во кои се вклучуваат луѓето кога бараат, селектираат, купуваат, користат и располагаат со производи и услуги за да ги задоволат своите потреби и желби. Во процесот на донесување одлука за купување, потрошувачите минуваат низ повеќе фази, односно стадиуми на кои соодветствуваат интерни психолошки процеси. Петте фази се: препознавање на проблемот, барање на информации, алтернативна проценка, одлука за купување и проценка по купувањето. Соодветно на нив, петте интерни психолошки процеси кои се случуваат се: мотивација, перцепција, формирање на став, интеграција и учење.