Американски студии: илегалните дроги меѓу американската младина

Abstract

Ако „иднината се купува со сегашноста“ (Самуил Џонсон), тогаш цената која сега ја плаќаат американските генерации на зависници од дрога е очигледно преголема во однос на иднината во која е вложена нивната хипотека од дрога. Денешната младина во однос на своите родители, а посебно на предците, има многу повеќе експериментирано со дрога и алкохол, додека негативното влијание што овие активности ќе го имаат врз нејзиното образование e тешко замисливо. Со денешните генерации на школска и универзитетска возраст кои се под директен напад од нарко-дилерите, нарко бизнисот и нарко картелите во кои се вклучени, се јавува прашањето: каква општествена вредност носи легализирањето на супстанцата за која статистиката докажува дека е погубна по националното здравје, без разлика на возраст, пол, етничка или класна припадност. Кое би било севкупното влијание на легализираната илегална дрога врз општеството, националната продуктивност, образовниот сектор, здравствената индустрија, врз спортскиот и атлетскиот живот како и врз духовното и морално самочувство, ако дрогата биде легализирана во име на слободата и човековите права, иако со тоа цели генерации ќе станат онеспособени, без здрава улога во културата и цивилизацијата?! Овој научен труд се занимава со кус преглед посебно на постари статистики со цел новите податоци да станат поистакнато очигледни во споредбената анализа на академско ниво и на ниво на медиумска информираност за темата.