СДИ И НИВНОТО ВЛИЈАНИЕ КАКО АКЦЕЛЕРАТОРИ НА ЕКОНОМСКИОТ РАЗВОЈ

Abstract

Странските директни инвестиции (СДИ) имаат значајно влијание
врз економскиот успех на многу земји во развој и земји во транзиција,
кои во последниве 15-тина години остварија динамичен економски раст
и зголемување на вработеноста. Од тие причини, странските директни
инвестиции се во фокусот на интересирање како кај економските
теоретичари и истражувачи, така и кај практичарите, посебно во земјите
во развој и земјите во транзиција.
Основна цел на земјите во транзиција е постигнување на стабилен,
долгорочен економски развој кој ќе се заснова на зголемување на
инвестициите, подобрување на технолошката база на овие земји и
зголемување на конкурентноста на нивните производи на меѓународен
пазар. Во реализирање на ваквите цели странските директни инвестиции
може да имаат значајна улога. СДИ можат да придонесат во процесот
на транзиција директно, преку прилив на капитал, и индиректно преку трансфер на технологија, менаџерски, производствен и организациски
know-how, преку создавање на нови продажни канали за домашното
претпријатие и преку зајакнување на конкуренцијата и процесот на
реструктурирање на домашната економија.
Всушност, целта на овој труд е да се потенцира значењето на СДИ
за економскиот развој врз националните економии и, посебно, нивното
значење за економскиот развој на Република Македонија.
Се смета дека СДИ претставуваат импулс во економскиот развој.
Имено, тие овозможуваат воведување на нова техника и технологија,
нови знаења, отворање на нови работни места, нови пазари, зголемување
на конкурентноста и продуктивноста.
Македонија е мала земја која за својот економски развој мора
да употребува дополнителна акумулација од странство. Економскиот
развој во изминатите петнаесетина години го карактеризираа недоволно
инвестирање во производството и мало учество на инвестиции во бруто
домашниот производ во споредба со други транзициски земји. Според
многумина експерти, инвестициите кои доаѓаат од домашни и странски
извори, а првенствено приливот на СДИ ќе овозможи на Македонија да
фати чекор со развиените земји.